Voss mållag var godt representert då Hordaland Mållag samla seg til seminar og årsmøte på Scandic hotell laurdag 14. og sundag 15. mars. Det vart ei innhaldsrik og vellukka helg, med både fagleg påfyll, kulturinnslag og heider til ein særs verdig prisvinnar.
Seminardagen baud på nyttig og aktuelt stoff for lokallaga. Erik Grov frå skrivarstova i Noregs Mållag snakka om praktisk lagsdrift og målpolitiske saker, medan banksjef Jørund Rong heldt eit engasjert innlegg om nynorsk i næringslivet. Han viste korleis Voss Sparebank med enkle og medvitne val har bygt opp ein tydeleg nynorsk profil, som ein naturleg del av banken sin identitet.
Pris til Vossa Jazz
Eit av høgdepunkta var utdelinga av målprisen frå Hordaland Mållag til Vossa Jazz. Festivalen var nominert av Voss mållag, og det var gledeleg å sjå at prisen gjekk til ein kulturinstitusjon som gjennom meir enn femti år har hatt nynorsken som ein sjølvsagd del av verksemda si. Festivalleiar Frøydis Århus tok imot prisen og sette på ein fin måte ord på samanhengen mellom språk og kulturarbeid.
Voss mållag hadde også ansvar for kulturinnslaget under festmiddagen. Der fekk årsmøtet oppleva framføringar med Knut Hamre, Halvor Heierland Farsethås og Berit Opheim.
Sundagen helsa ordføraren i Voss herad årsmøtet, før sjølve årsmøtesakene vart handsama utan store usemjer. Steinulf Tungesvik vart attvald som leiar.